Noh Tel Lai!
Wahn day ah disaid fi tek wahn luk,
Eena di Baibl dat preshos buk;
Ah ton dairekli tu Aks chapta faiv,
Ahn reed bowt how di erli chuch servis.
Dehn ah reed bowt wahn man ahn ih waif,
How lai kaz dehn fi looz dehn laif;
Di too ah dehn mek wahn diseetful plan;
Aftah dehn sel wahn big pees ah lan.
Ananias ahn Saphira seh,
"Dis dah wahn taim wee wahn chrik dehn;
Wee wahn haid sohn moni bihain di shelf,
Ahn spen som ah it pahn foh wee self!"
Ananias waak schrayt eena choch,
Dehn taihn deh Peeta mi reeli toch!
Kaz di Spirit ah Gaad mi don riveel,
Dat Ananias ahn ih waif mi mek wahn deel!
Soh Peeta aks ahn, "Dah onli dat?"
Ahn Ananias ansah, "Dis dah aal ah gat!"
Dehn Peeta aks ahn, "Wai yoo di chrai,
Foh diseev di Laad bai telin wahn lai?
Dah lan mi aalwayz bilang tu yoo,
Yoh kud ah mi kip aal di moni too!
Yoh neva hav tu kohn priten,
Bot Gaad wahn deel wid yoo, mi fren!
Dehn Ananias faal dong bak way,
Ahn fyaa kom eena di chuch dah day!
Di pipl dehn si dat ih noh pay fi lai,
Ahn how Ananias jrap dong ahn dai!
Dehn witnis how ih faal pahn di floa,
Ahn sohn man kohn bak ah chroo di doa!
Dehn chree owaz afta Saphira step een,
Ah tink shee mi priti ahn ih kloaz mi kleen!
Bot ih ripeet di lai Ananias mi tel,
Ahn shee jrap dong ded az wel!
Kaaz Peeta mi tel ahn how ih wahn bee,
Dat hoo ker Ananias wahn ker shee!
Di man dehn pik ahn op aaf ah di floa,
Ahn gaan wid ahn rait chroo di doa!
Dehn beri ahn rait bisaid ih man,
Sayk a tel lai bow wahn pees ah lai
Now, evri badi kud playnli si,
Dat dis mesij dah fi aal ah wi!
Soh unu reeli mek wi chrai,Fi du di rait ting ahn noh tel lai!
“Haavis Eena Belize”
“Harvest in Belize”
Eena Belize plantayshan weh di son meet di ert,
Pikni gyada dehn chrejaz a infinayt wert;
Baaskit ful to di brim wid lata froot ahn sweet,
Da Cherch evribadi wahn jaifuli meet.
Wid dehn haat ful ah grays ahn dehn spirit aglow,
Dehn maach dong di ailz, dehn steps shoar ahn slow;
Eech froot tel wahn stoari, eech vers hav ih sang,
Eena dis ya koaros, aal ah dehn bilang.
Mango, ahn goalin plom, kis bai di son,
Tel wi bou blesinz weh jos kyahn don;
Banana, laik raynbow, eena klostaz dehn sway,
Pramis wi hoap fi wahn braita nyoo day.
Papaya, laik joowelz, eena oreenj dilait,
Wispa bout Gaad maavilos lait;
Ahn gwaava, soh hombl, bot rich in dehn hyooz,
Riflek di grays Gaad fereva rinyooz.
Unu Belizean pikni eena big plantayshan,
Wid baaskit ful ful eena Gaad hoali lan;
Unu teech wee wahn lesn weh wee laan wid eez,
Ahn wi giv Gaad di gloari fi haavis da Belize.
​
